U so han ig mau probiert e ganz fule Tag z mache. Das heisst i hami nid witer als imne Umkreis vo 20m bewegt. E raechti Leistig fuer mi. Eifach chli siii, chli luege, chli laese, eis Schnaepperle... I stah gmuetlech uf u dusche u loufe die 10 meter zum chline restaurant, wo d Frou am Bode ligt u TV luegt, sie lachet mi a u seit sabaidi. i sitze mau ab u warte chli. de steit si uf u bringt mr z menue. Good sleep? yes yes, thank you, and you? - Iced coffee with sweet milk? - ja sie kennt mi scho, bi schliesslech stammgast u die einzig sid drue taeg... De bsteui no es baguette mit 2 Spiegueier und e mixed fruit salad. Sie lachet u nickt. De packt si ihre Toeff u geit mis zmorge ga ichoufe. U i blaettere nochli i mim Buech... so nach 2 stund bini de nache u ga 5 meter uebere zur Lea, e jungi Laotin wo es Internetkafi het uftah. Gester simr zaeme anes Tempelfestival. Nach 50 Meter het si gfunde, ixgus mi im tired. can we stopp? waterfall. und tippet uf ihri stirne wos aberuennelet. Ja, fuer sie ischs scho e witi Strecki gsy. Fuer gwoehnlech nimmt me da scho z Velo oder z Toeffli. Nach em Maile bini de i mini Haengematte u ha am Gwitter zuegluegt und de Luet wo ihri Abetoilette im Fluss mache mit Woesch waesche und Zaehnd putze... U so cha e Tag ganz schnaell umegah...
Bild 1: Mi Privat Balkon
Bild 2: Mis Zmorgerestaurant
Bild 3: Mis Internetkafi vom Zmorgerestaurant us
Bild 4: Mis Bungalow vo hinde vom Zmorgerestaurant us
ps: es ischmr chli laengwilig... ha gloub no nie sone Blogitrag gmacht...
2 Kommentare:
hey tricky, no worries, ou we nid immer super tricky blogs häreleisch, ig finges glich spannend : ) gseht ämu supi us dis balkönli, würd dir grad gern chli gsellschaft leischte : )
las dir la guet gha, drücker
i hätti da no ä vorschlag gha zum zitvertribä: uspuff zelle :-)
schmatzer us expo-city!
Kommentar veröffentlichen