Himalaya? No no Svizzera!!!

U da schlaht mis Haerz grad hoecher... wunderpraechtigs Naebumeer, willkomme ir Heimat, im Heidiland u Zueri begruesst mi mitem Gemuhe und Alphornklaeng i ihrem Midfield Terminal... und oh isch das alles gruen! Bis iz isch aube mis Rockli z gruenschte xi... Ja bau chli sentimentau worde bini auso scho ab mim Empfang - liebi Luet - richtigs Brot u Alpchaes u Honig... U aendlech widermau ae Woeschmaschine u nid vo Hang mit Seife schrubbe... U morn gani dr GP ga luege, u froeiemi seckle die u nid ig... i wuerd gloub nume dr Aargouerstaude aberugele mit mire Kondition vom Schnorchle u Suennele... Ja eigentlech hani ja iz gnue Summer gha u aehm, i froeiemi scho wider uf Winter weni cha ga Telemaerkle...

So u i hoffe dae Blog heig oeich ou ab u zue dr Alltag la vergaesse oder emu dr Alltag versuesst...

U villech gits ja de naechst Jahr die naechste Muesterli... why not?...

Churz vorem Furtspicke

U so packi mis tröie Mammut u nime dr Summer mit i d Schwiz...

Schwizer Kafiplantage?!

E e wie hani o gstuunet, d Haco Fabrik macht ou Kafi? Fuer die Erkenntnis bini doch am chline Flughafe in Surathani dankbar... viu viu besser als Nescafe! Und das naette Glaesli macht sich guet naebem Davidoff Kafi...

Farewell Gourmand Kitsch Chueche

Spannend isch mi Bsuech gsy bim Coiffeuse, Le Femme, Ladyboy. Ha daenkt we dae sich so pflegt u usepuetzlet, de git das ganz sicher e naette Haarschnitt. Offesichtlich het s Spass gmacht mini Haar z schnide. Grosszuegig isch die salzegi kokosoel Haarpracht ufe Bode gfloge bis i energisch (jawohli ig cha energisch si weni wott hihi) gfunde ha: hey, i said not so short, know stop... U so het Le Femme toeif glaechlet "oh ixguus me". Da gits Leider keis Foeteli drzue, da muesst dr iz haut chli euchi eigeti Fantasie die Szene la abspiele...


Ja da bini doch de meh beidruckt gsy vom Turtemaa... Dr groescht Schoggichueche hani la bache u wie sichs fuernes Italienisches Restaurant ghoert, sehr sehr kitschegi Dekoration... (S lohnt sich ds Foeteli chli haere z zoome).
U so hei mir ir Villa Tao Thong no mi Abschlussabe gfiiret, mit Happy Cherzli drzue. Irgendwie komisch, das soell iz dr letscht Abe sii in Asie? Wunderbar dae a somne Ort choenne z gniesse. Wit waeg vode rote Hemmli, de broennende Gebaeude.
Obi wider mau a daem schoene Ort wirde sii? Wider naebem chline Schildchrot cha schwuemme? Ir Skybar obe Billard spile u philosophiere? Eifach ufstah weni ufwache, Toucherbruelle u Schnorchu packe u iz Meer springe, id Ungerwasserwaelt abtouche. Neugierig die verschidene Gschichte vode Luet wos immer wider da haere verschlat erfrage. U z naechste Mal giengi mit ga Fische im Sunneungergang. U i wuerd mitem Kajak z ganze Inseli umfahre u i wuerd wider ir Nacht mit dr Taschelampe iz Meer fuer die silbrig luechtende Tuepfli z bestuune, geng druf bedacht nid ufne gruusegi Seegurke z stah... -Ja die 10 Tag hie si so cheibe gschwing verbii.

Die zfridne Luet ir Villa Tao Thong

Ob Burmes oder Franzos oder dr chli Burmesischduetsch Bueb oder Schwizer, oder Duetsch oder was ou immer. D Villa Tao Thong isch wie dr Frank sit 15 Jahr meint: eine Lebendfalle... Aes Oertli wo eim eifach as Haerz wachst mit dene haerzleche Luet u daem schoene eifache Ambiente und daem wunderbare Meer wo eim ir Nacht so schoen i Schlaf ruuuschet.

Unruhigs Bankok

Ja d SchwizerBotschaft heigesi ja schins zue tah hani grad mituebercho... U i eim Artikel isch gstande, dass allwae kei Schwizer Touriste me in Bankok sige. Me weiss gar nis so wie me das ganze soell ischaetze. D Luet hie loeh sich weniger us dr Rueh bringe. Sie luege churz im Fernseh was so dr Stand isch, schuettle dr Chopf u steue dr Fernseh wider ab. Was sie wuerklech daenke ueber die Sach isch no schwirig z erfahre.

Hm u so entscheidi morn de, obi mitem Bus nach Bankok gah oder villech doch e Flug vo Ko Samui us... Uf jede Fau hoffi si bhaute dr Flughafe no offe, schliesslech vermissi euch scho fescht u froeiemi zruegg z sii am Fritig morge.

Usstiger uf Ko Tao

Ja ou so chame laebe hie...

juhui, es raegnet

Bitter noetig ischs dae Raege. Grad 15 Minute ischs gange. So hets um es paar Grad abgchuehlet uf 34 abe... aber dank dere Waermi ohni Raege ischs sogar de Mugge z heiss...Sehr sympahtisch. Uebrigens isch das d Sicht uf ds Restaurant, weni uf mim Balkoenli stah u links uebere luege.

Sooo kitschig...

Wider mau es Biudli vomne Sunneundergang... U churz vorhaer bini no ga Schnorchle, u tatsaechlech hani e Schildchrot xeh, wo ufmi zuegschwumme isch. Schono schreg. Bis iz hani die eher im Daelhoelzli agluegt, aber so uf dr gliche Site vor *Glasschibe* schwuemme isch schono mau oeppis angers...

Dr Wachhund vor Villa Tao Thong

Darfi vorstelle, das isch auso dr uesserst liebenswuerdig Wachhund vo daem Oertli woni grad e gueti Wuche wohne. U sis unverkennbare Markezeiche isch eifach die z laengi Zunge...

Ferie ide Ferie...

Schochli fraech die Biudli ufe Blog z tue... I ha mau glehrt, dass me sech ide Ferie vode Ferie soell erhole - e goldige Tipp. U so bini immero uf Ko Tao amne ruhige Oertli, wunderbar. U eis vode wunderbarste Bungalows wome allwae cha ha, cheibe wohl ischs mr da. ( i ha z Bungalow gwaechslet, witer fuere az Meer u mau luege ob mis Hustier ou mitcho isch... i hami inzwuesche ou a die groessere Gekos gwoehnt. 25cm heieiei isch das gross). U so stahni am Morge uf fuerne Morgeschwumm, schliesslech soellme Wasser spare, naer gits z Morge - mi Favorit isch uebrigens dr Banana Erdnuessli Shake, wunderbar. U naer chli suennele, lang hauti das zwar nid us bi dene Temerature, wider chli Schnorchle de choeme die Fischli wo a eim Stuepfe wilsi eim wei Putze, heieiei i verchluepfe jedes mal. Ja u laese u 20min i ds naechste Doerfli loufe fuernes Internet... De es Schnorchle im Sunneundergang, aschinend hets 2 Schildchrote hie wo am Abe choeme, die suechi jede Abe aber bis iz hani no nuet xeh, irgendwie ischs chli verflixt mit dene Haie und Schildchrote... U wos gester dunku worde isch hani d Taschelampe mitgno iz Wasser - oh mis absolute Highlight ischs we dr Plankton naer Ungerwasser luechtet als haettsch d Staerne zum griife nah... Ja we d Schwiz no es Meer haetti, de waers wuerklech 1. Heaven on earth...

Mein Haustier

Eigentlich habe ich gedacht, die Gekos seinen - da Mueckenfresser - meine neuen Lieblingstiere. Naja, nur habe ich bisher noch nie ein so riesiges Tier der Gattung Geko gesehen! Da musste ich doch ganz tief durchatmen und mir einreden wie huebsch das lustige Tierlein ist und dass dieses sicher riesen Appetit hat und alle Muecken vertilgt und sicherlich hat es mehr Angst vor mir als ich vor ihm...und wenn es mit den Saugnapffuesschen so nett an Waenden und ueberhaengend krabbelt ist das Geraeusch fast wie Maeuse auf dem Dachboden oder so... Doch als ich die erste Nacht in diesem Bungalow im Bett lag, habe ich doch ganz gerne Gebrauch vom Moskitonetz gemacht, nicht wirklich wegen Moskitos...

I schine nid die einzig z sy...

Eh lug ou da... Ear cleaning schint oeppis z sii, wo einigi Reisendi drvo Gebruch mache in Ko Tao. Villech e spezieui Form vo Ohrmassage hihi... und es schiint oeppis ganz wichtigs z sii - warum hani aech das i mim 1. Hilfkurs nie glehrt?

Dr Smile, nachdaem mr ae Whale Shark xeh hei

U de touche mr widermau ab, dr Englaender Divemaster Andrew links, u d Julie us England wo ou mit mir im Advanced Kurs isch. Richtig, die wo z Teebueteli so lang drin bhaute. Auso mir touche ab u ig beschaeftiget mit em Foeteler woni huet no gmietet ha. De bini chli am usprobiere mit zoom u mit oder ohni Blitz oder was fuerne Modus ou immer u voila, da choeme mr ploetzlech ganz viu Fischli entgaege, wunderbar die Farbe u i schwuemme de andere zwoei nache u klicke hie u dae u grossi Fischschwaerm - hmmm u im aendeffekt het d frou goetz nid realisiert, dass mir tatsaechlech 4 Minute lang parallel zumne Whale Shark (nid gfaehrlech) gschwumme si. U sie het so fescht im Momaent glaebt, dass si nid ueberleit het, dass villech die rise Fischschwaerm nid eifach so per zuefau drvo schwuemme.. Aber Aebe. Tomate uf de Ouge... Aber tataaaa, grad am Aendi vom Touchgang chunnt no e zwoeite u dae ha de ou ig gseh u d Kamera hani naemlech de schlauerwiis scho ir Julie gaeh gha. Z Foeteli chunnt deno. Schochli stolz, die gsaech me u saelte...

Touchkurs

Am eis packe d Schueler ihri 7 Sache i d Taesche u ab geits ufme chline Boetli zum groessere wo witer usse parat steit mit de Flaesche schoen ufgreielet... De montiert jede sini Usrueschtig u de geits ab ufs Deck fuer d Theorie bis mr am Touchplatz si. De chunnt dr erst Touchgang mit Uebige oeppe e Stund. Naer hani mi immer uf die fruesch Ananas u Kokosguetzi gfroeit, oh git das Hunger im Wasser. U naer hani mi vo 2 Englaender la belehre, dass me die Guetzi im Schwarztee tuenklet u z Buetteli vom Schwarztee dinne laht... Keis Wunder muess me nochli oeppis i Tee tue we dae naer so bitter isch! S isch wuerklech intressant das Touche. Vorauem d Ueswuerkig vo meh Druck u z Nepal weniger Druck... Nume muesme nachem Touche 6 Std warte bisme e Massage cha la mache het mi Ohredoekti gmeint.

Dr gross Kapitaen

Tag fuer Tag fahert er die Leute der Diving School zu diversen Plaetzen im Sueden von Ko Tao. Er laesst sich nicht aus der Ruhe bringen - steuert Gedanken versunken in seiner Welt. Ueber den Touristenrummel erhaben. Beim Aufstieg aufs Boot ist auf einem Zettel zu lesen: The Front of the Boat is a holy area...

Dr chlii Kaepten

Stundelang isch er beschaeftiget xi mitem Seili ufezieh u sortiere u wider iz Wasser u wider ufs Boot...

Carabao Dive School

Auso ganz naett das Biudli he, das isch grad ziemlich Blick us mim Zimmerfaenster, wow u weme dr Touchkurs macht, de isch d Unterkunft gratis. Da hani doch grad zuegschlage... U so tukerli jede Tag ufs Meer use u leere veiechli viu ueber z drum u dra vom Touche, was auso mim Hirni grad wider sehr guet tuet. So hani de dae multiple choice Test ou bestande juhui! U irgendwo i mine Hirnwindige hani doch schomau so oeppis wie Gesetz nach Boyle und vode Gezeiten glehrt aber aeuae nume theoretisch u de geit das aube nid so fuer lang i mi Chopf... Aber iz hani ja praktischi Bispiu. U mini Ohre hani ouno la schpuele. Ha Mueh gha mitem Druckusglich u de bini zum Toucherdokter, dae het nume glachet u gfunde oh there is a lot of stuff inside hoe hoe. sones dumms gfuehl sech das zueg la usespuehle, aber oha, dr Druckusglich het waesentlech besser funktioniert naechaer. Ja bi dene stoubige Strasse u dr hoechere Schmalzproduktion (hani mi la belehre dae waerdi erhoeht duere Waechsu vo warm dusse u dr chalte klimaalag dinne) gits scho mau e Tanggupropfe...